حاجه تعرفك ان انت اتربيت في بيت مصري ....؟؟

( أزاي تعرف أنك اتربيت في بيت مصري)
علي مدي سنوات الطفولة والمراهقة يقطع الابن منزل أسرته رايح جاي وهو يستمع للنصائح والتوجيهات نفسها والتوبيخ نفسه بأساليب وجمل ثابتة لا تتغير .. حتي أصبحنا بمرور الوقت نحفظها جيداً ونتوقعها ( واهالينا يقولوا وأحنا نكمل لهم ) واسترجاع هذه المقولات " التي لا تسمعها إلا في البيت المصري " يبعث في الوجدان قشعريرة مصحوبة بنوع من الكوميديا . ويعمق محبة أهالينا في القلوب . ويجعلنا نكتشف كم الهستيريا والقلق والمسئولية التي تكبدها الأهالي في سبيل أن تقف فخوراً برأي الناس فيك " شكله بن ناس .. ومتربي "
المهم يلا نشوف بيقوولوا ايييييييييه

نبدأ في الجمل :-

1- مش عايز أسمع صوت . وفي هذه الجملة تدريباً مبكراً علي تقبل الديكتاتورية الذي سوف تواجها طول حياتك .

2- ما تردش عليا . ودي نصيحة إذا ألتزمت بها سوف تكسب مديرك في العمل .

3- تقعد في أول صف أدام السبورة.

4- لو مش فاهم حاجة .. ارفع أيدك وقول للاستاذ مش فاهم ما تتكسفش .. فاكرين المدرسين زي اللي كانوا علي أيامهم .

5- اللي بيشيل قربة مخرومة بتخر عليه لوحده.

6- ومالها الكتب بتاعة الوزارة ؟ !

7- بص كويس وأنت بتعدي الشارع .

8- متتأخرش بعد المدرسة وتقعد تصيع مع أصحابك .. وهي نصيحة سوف تحقق لك قدراً من السعادة الزوجية فيما بعد إذا تعودت علي أن تكون رجلا من الشغل للبيت

9- أفرد ضهرك .

10- مافيش مذاكرة علي المزيكا .. أو.. بتذاكر أزاي والبتاع دا شغال جنبك .

11- ماتمشيش حافي في السقعة دي .

12- صليت العصر ؟!

13- ربنا يهديك يابني .. وأحيانا أنك لا تهدي من أحببت .

14- أطفي التلفزيون دا وقوم ذاكرلك حاجة تنفعك دا الامتحان قرب حتي لو كنا في أول المدارس .. أو .. أطفي التلفزيون وقوم خش أوضتك .

15-أوعي تقول لحد هاتلي حاجة .

16- أقفل صدرك

17-بلاش وقفات الشبابيك والبلاكونات.

18-كل علي مهلك .. وامضغ كويس .. ومتكولش وأنت واقف .

19-كفاية رغي في التليفون .

20-ما تقعدش قدام المروحة وانت لسه مستحمي .

21-المسلسل مش هينفعك ... قوم ذاكر .

23- وأنت فاكر أحنا مستنين منك حاجة ؟!

24-متعليش صوتك عليا .

25-بلاش لعب في الشارع .

26-يابني ألي ذاكر ذاكر خلاص .. قوم نام

27- بلاش لعب بالمقص .... بيجيب الفقر .

28-يابني كلم خالتك العيانة أسأل عليها .

29-أوعي حد غريب يديك حاجة من برا تاكلها أو تشربها وتخدها

30-النوم لحد الظهر يجيب الفقر ..

31- أوعي تكدب عليا تاني مرة .

32- لازم تاكل سلطة ..

33- لو شفت خناقة ملكش دعوة بيها .

34-عيب.. لازم تحترم ألي أكبر منك .

35- كلمنا لما توصل .

36- ملكش دعوة بالسياسة .

37-بلاش أكل برا ..

38-لو فلحت أبقي تعالي " أعمل بي بي علي قبري " .. ( إيه الخيال دا )

39-ما تلبس القميص علي اللحم زي العيال الصايعة .

40-يا بني أنت مسطول ولا أيه .

41- أنت فاكرنا نايمين علي ودانا ؟!

42-وطي الزفت دا شوية .

43- قوم أقرأ لك كلمتين ينفعوك .

44- أيه اللامبالاه والاستهتار اللي أنت عايش فيهم دول .

45-أنت فاكر احنا لاقيين الفلوس دي في الشارع .

46- والله منتا فالح .. وأدي دقني أهى .

47- ما تتكلمش بصوت عالي في الحمام .

48- ما تنامش ألا أما تغسل سنانك .

49-ما تلزقش في التلفزيون كده .. نظرك هيضعف .

50- ضرب أمثلة تشجع علي الكفاح وأشهرها " أحد الأقارب اللي ذاكر علي لمبة الجاز أو علي نور العمود في الشارع وخد الدكتوراه وسافر أمريكا )

51-سلم علي عمك كويس يا ولد .

52-يا بني محدش بينفع حد .

53- ماتطلعش أيديك من شباك العربية .

54- قصة الغريق الكاذب ألي كل مرة يقول ألحقوني لغاية مغرق بجد .

55-ربنا يرزقك بعيل يوريك اللي أنت ورتهولنا .

56- اقلب القناة دي بلاش مسخرة وقلة أدب.

57- طلع أيدك من جيبك وأنت بتكلمنا .




يارب تعجبكم